Thursday, November 29, 2012

Fables and Folktales

រឿង សត្វតោនិងតាកាប់ឧស

(បទ កាកគតិ)
តោមួយកំណាច         ឃោរឃៅកោងកាច            អាងអំណាចយស
ចង់បានកូនស្រី          តាអ្នកកាប់ឧស                    យកមករួមរស់
                                   ជាភរិយា ។
ខ្លាចអំណាចតោ         តាភ័យឆោឡោ                    អេះអុញរួញរា
មិនហ៊ានប្រកែក         នូវការទាមទារ                    តោចិត្តពាលា
                                   សាហាវយង់ឃ្នង ។
ដោយប្រាជ្ញាវៃ           តាគិតលកលៃ                     ប្រឡងសាកល្បង
ឆ្លើយប្រាប់ទៅតោ     ព្រមតាមបំណង                  តែសូមតោផង
                                   នូវលក្ខខណ្ឌមួយ ។
តើលក្ខខណ្ឌអ្វី ?         តោហាស្រដី                      គ្មានបារម្ភព្រួយ
អាងអំណាចឫទ្ធិ         តោអញតែមួយ                  តាអើយកុំព្រួយ
                                    ធ្វើបានទាំងអស់ ។
តាថាកូនស្រី               នាងនៅក្មេងខ្ចី                 សូមលោកសន្តោស
មានការភ័យខ្លាច        ចង្កូមទានប្រុស               សុំកាត់ឲ្យអស់
                                    ដោយក្តីមេត្តា ។
ម្យ៉ាងខ្លាចក្រញាំ         ក្រចកឆ្វេងស្តាំ                 វែងស្រួចអស្ចារ្យ
សូមកាត់ទាំងអស់        មុនថ្ងៃរៀបការ                ដោយករុណា
                                     ទានប្រោសប្រណី ។
តោឥតប្រកែក             ចិន្តាសែនត្រេក                បានស្តាប់សម្តី
តាអ្នកកាប់ឧស           ថ្លែងយ៉ាងវាងវៃ                 កាត់ក្រញាំខ្លី
                                    និងចង្កូមផង ។
ដល់ថ្ងៃរៀបការ           អស់ឫទ្ធិខ្លាំងក្លា                ត្រូវនឹងដំបង
តោអត់ចង្កូម                 តាវាយសំពង             បែកក្បាលបាក់លោង
                                     រត់ចូលព្រៃជ្រៅ ៕
អំណាចមិនអាចឈ្នះប្រាជ្ញា

No comments: