រឿងល្បើកនិងរឿងនិទាន

រឿង ជ្រឹងនិងចាបជាប់ក្នុងទ្រុង

(បទពាក្យ ៧)

មានសត្វចាបមួយជាប់ក្នុងទ្រុង      ដែលម្ចាស់តែងចងក្បែរបង្អួច

រៀងរាល់រាត្រីច្រៀងអង្កួច               សំនៀងគ្រលួចពេញវេហាស៍ ។

ចាបច្រៀងបំពេម្ចាស់សំណព្វ          ឲ្យដេកលក់ស្កប់ស្ងប់ចិន្តា

មិនដែលខកខានមួយយប់ណា        សម្រាកកាយាតែពេលថ្ងៃ ។

ជួនជាយប់មួយមានសត្វជ្រឹង            ហើរឆ្វែលក្រឡឹងរកចំណី

នៅក្បែរទ្រុងចាបចិត្តសង្ស័យ            ចង់សួរសេចក្តីរកហេតុផល ។

ជ្រឹងបន្ទាបខ្លួនទំនៅក្បែរ                   សាកសួរហូរហែឲ្យអស់ឆ្ងល់

ថាឱ ! ចាបអើយខ្ញុំពិភាល់                 ម្តេចអ្នកច្រៀងរាល់រាត្រីស្ងាត់ ។

មិនដែលឮអ្នកច្រៀងពេលថ្ងៃ            តើមានរឿងអ្វីជាសម្ងាត់

ឬអ្នករងទុក្ខមានវិបត្តិ                        លុះរាត្រីស្ងាត់ទើបច្រៀងបាន ។

ចាបបានឮហើយឆ្លើយរ៉ាយរ៉ាប់        រៀបរាប់រឿងប្រាប់ជ្រឹងកល្យាណ

ថាបងជ្រឹងអើយខ្ញុំខកប្រាណ           ដ្បិតគ្រាមួយបានច្រៀងពេលថ្ងៃ ។

ខ្ញុំច្រៀងសប្បាយនឹងមិត្តភក្តិ             ត្រូវម្ចាស់ខ្ញុំទាក់ឥតប្រណី

ដាក់ទ្រុងរូបខ្ញុំដល់សព្វថ្ងៃ                  បាត់បង់សេរីលុះឥឡូវ ។

ចាប់តាំងពីពេលនោះមករ៉ា                ខ្ញុំបានសច្ចាថាខ្លួនត្រូវ

ច្រៀងតែពេលយប់ងងឹតជ្រៅ           ទើបផុតហ្មងសៅទាំងឡាយផង ។

ជ្រឹងស្តាប់យល់ហេតុអស់ចម្ងល់       គិតថាហេតុផលសមកន្លង

តែហួសពេលហើយគ្រានេះម្តង        ចាបជាប់ចំណងរស់ក្នុងទ្រុង ៕

ការពារក្រោយឧប្បត្តិហេតុដែលបានកើតឡើងហើយ ជាទង្វើឥតប្រយោជន៍