Friday, September 14, 2012

Fables and Folktales

រឿង លា មាន់គក និង ខ្លា

(បទ កាកគតិ)
សត្វលាកម្លៅ            កំពុងស៊ីស្មៅ                  នៅលើភ្លឺស្រែ
ជាមួយមាន់គក         រកចំណីដែរ                    កៀនគុម្ពសង្កែ
                                   ដុះក្បែរមាត់ព្រៃ ។
មានសត្វខ្លាមួយ        រស់រងទុក្ខព្រួយ              ខ្លួនស្គមរីងរៃ
ព្រោះអត់អាហារ        ស៊ីជាច្រើនថ្ងៃ                ឃើញលាចង់ឆី
                                    ចម្អែតក្រពះ ។
ពេលនោះមាន់គក      ឃើញខ្លាចូលមក          ជាយភូមិក្រោយផ្ទះ
ចង់ចាប់លាស៊ី           ពិតប្រាកដណាស់          វាក៏ទទះ
                                   ស្លាបស្រែករងាវ ។
ដើម្បីប្រាប់លា           ឲ្យរត់គេចវៀះ                 ពីខ្លាហត់ហេវ
អត់ឃ្លានយូរថ្ងៃ          ក្រពះស្វិតជីវ                 លបលូនលឿនស្លេវ
                                    តម្រង់ចាប់លា ។
សម្លេងកញ្ជ្រៀវ          មាន់គករងាវ                  ដាស់អារម្មណ៍លា
ឮដល់សត្វខ្លា             ភ្ញាក់ឈប់ដកឃ្លា          ប្រញាប់ម្នីម្នា
                                   ងាកក្រោយរត់ពួន ។
លាឃើញខ្លារត់          ក្នុងចិត្តសន្មត់                ថាខ្លាខ្លាចខ្លួន
ស្ទុះដេញខាំខ្លា           កំពុងរត់ពួន                   ខ្លាបានជួបជួន
                                   កាច់កលាស៊ី ៕

No comments:

ចំណីខួរក្បាល

ខ្មោច ខ្ញុំចង់សរសេរអំពី ខ្មោច យូរហើយ តែវាជាប្រធានបទដែលខ្ញុំខ្លាចខ្លាំង ។ ដែលខ្លាចនោះមិនមែនខ្ញុំខ្លាចខ្មោចទេ គឺខ្ញុំខ្លាចបង្កឲ្យមានការថ្នាំ...