រឿងល្បើកនិងរឿងនិទាន

រឿង តាក្បាលទំពែកនិងសត្វរុយ

(បទ ភុជង្គលីលា)
សត្វរុយតូចមួយបានហើរ     មកទំនៅលើ             ក្បាលតាទំពែក ។
ដើម្បីជញ្ជក់ខាំហែក         បឺតឈាមយ៉ាងត្រេក    ត្រអាលពីគាត់ ។
តាក៏លើកដៃទះវាត់          រុយខាំក្បាលគាត់           ឲ្យស្លាប់តៃហោង ។
តែរុយហោះហើរគេចឆ្លង    តាជ្រុលដៃផង            ទះត្រូវក្បាលឯង ។
រុយរួចពីស្លាប់ក៏ថ្លែង            ចំអកខែងរ៉ែង              ដាក់តានោះថា ។
គ្រាន់តែរុយខាំក្បាលតា      តើឈឺប៉ុនណា            បានជាតាខឹង ។
ចង់សម្លាប់តាមកំហឹង         ឥឡូវសមនឹង             ឈឺខ្លួនឯងហើយ ។
តាឮដូច្នោះក៏ឆ្លើយ             រុយអើយកុំឈ្លើយ       ព្រហើនខ្លាំងពេក ។
ទោះឈឺលើសនេះអនេក    ឬក្បាលយើងបែក     ក៏យើងករុណា ។
ព្រោះយើងគ្មានចិត្តចេតនា   ធ្វើឲ្យអាត្មា               យើងឈឺនោះអី ។
តែឯងជាសត្វចង្រៃ             គួរឲ្យស្អប់ក្រៃ             ជាតិសត្វតិរិច្ឆាន ។
បើអាចសម្លាប់ឯងបាន        ទោះបីឈឺប្រាណ      លើសនេះរយដង ។
ក៏យើងសុខចិត្តឥតហ្មង       ឲ្យតែបំណង             យើងបានសម្រេច ៕

ពៀរគឺអាចរំងាប់បានដោយការមិនចងពៀរ