Saturday, March 2, 2013

រឿងល្បើកនិងរឿងនិទាន

រឿង ទន្សាយនិងផ្លែត្នោត

(បទ កាកគតិ)
ទន្សាយមួយឆោត         ដេកក្រោមដើមត្នោត      នៅក្បែរគល់ជ្រៃ
ជួនផ្លែត្នោតទុំ                ជ្រុះធ្លាក់មកដី                  រញ្ជួយប្រថពី
                                       វាភ័យស្ទុះរត់ ។
ស្រែកប្រាប់គ្នីគ្នា           ថាគ្រោះមរណា               មកដល់ប្រាកដ
ផែនដីរញ្ជួយ                 កក្រើកបាក់ស្រុត             ច្នេះយើងឆាប់រត់
                                      គេចចេញឲ្យឆ្ងាយ ។
សត្វផងនានា               ឮទន្សាយថា                 មានគ្រោះមហន្តរាយ
នាំគ្នាស្ទុះរត់                 ជាន់គ្នាពេញព្រៃ            ខ្លះបាក់ជើងដៃ
                                     ដល់ក្តីមរណា ។
ក្សិណនោះដំរី              ជាសត្វឈ្លាសវៃ             គិតពិចារណា
ថាបើផែនដី                 រញ្ជួយមែនណា               ម្តេចឈើនានា
                                     នៅឈរនឹងថ្កល់ ។
ដើម្បីបញ្ជាក់                ឲ្យឃើញជាក់លាក់          ផុតក្តីពិភាល់
ដំរីសួរថា                      នរណាឃើញផ្ទាល់          នាំយើងទៅដល់
                                     កន្លែងកើតហេតុ ។
ទន្សាយឆ្លើយថា          គឺខ្ញុំនេះណា                     ឃើញអព្ភូតហេតុ
ផែនដីរញ្ជួយ                ក៏ស្ទុះរត់ភ្លែត                    ស្រែកប្រាប់មូលហេតុ
                                     ដល់សត្វគ្រប់គ្នា ។
ដំរីពោលថា                 បើដូច្នេះណា                     ឯងឆាប់ម្នីម្នា
នាំពួកយើងទៅ           កន្លែងនោះណា                 ដើម្បីទស្សនា
                                     ឲ្យឃើញប្រត្យក្ស ។
ពេលដើរទៅដល់         ក្រោមដើមត្នោតគល់         ផ្លែទុំជ្រុះធ្លាក់
មិនឃើញមានអ្វី           គួរឲ្យផ្អើលភ្ញាក់                  ផែនដីអត់បាក់
                                      ស្រុតបន្តិចឡើយ ។
ពេលនោះដំរី                ប្រាប់អស់ម្រឹគី                    ម្រឹគាទាំងឡាយ
ថាផ្លែត្នោតនេះ              ធ្លាក់ក្បែរទន្សាយ               វាភ័យរត់ផាយ
                                      ថាផែនដីបាក់ ៕
មុននឹងប្រកាសអាសន្ន ត្រូវពិនិត្យមើលគ្រោះអាសន្ន
ឲ្យឃើញច្បាស់លាស់សិន

No comments: